UEFA ҳозирча FIFA президенти Жанни Инфантинони лавозимидан четлатиш бўйича ҳеч қандай расмий жараён бошлашни режалаштирмаяпти. Бу ҳақда Франциянинг «Le Parisien» нашри ўз манбаларига таяниб ёзмоқда.
Нашр маълумотига кўра, UEFA доирасида ўтказилган сўнгги учрашувларда Инфантино илгари сурган FIFAга хусусий инвесторларни жалб қилиш лойиҳаси муҳокама қилинган. Бироқ танқидларга қарамай, уни ишончсизлик вотуми орқали лавозимидан четлатиш масаласи кун тартибига қўйилмаган.
«Le Parisien»нинг таъкидлашича, FIFA низомининг 25-моддасига биноан, аъзо ассоциацияларнинг камида 20 фоизи талаб билдирса, навбатдан ташқари конгресс чақириш мумкин. Бундай йиғилишда президентга нисбатан ишончсизлик вотуми ташаббуси кўтарилиши мумкин. UEFA эса FIFAдаги овозларнинг 26 фоизига эга.
Шу билан бирга, нашрнинг ёзишича, Франция футбол федерацияси ва UEFA таркибидаги бошқа миллий ассоциациялар ҳозирча бундай ташаббус билан чиқиш ниятида эмас. Шу боис Инфантинонинг тақдири эҳтимолий сиёсий жараён эмас, балки сайлов орқали ҳал қилиниши кутилмоқда.
Аввалроқ Жанни Инфантино Жаҳон чемпионати тижорий ҳуқуқларининг бир қисмини хусусий инвесторларга таклиф қилиш режаси ортидан кескин танқидларга учраган эди. UEFA, AFC, CONCACAF ва CONMEBOL ушбу ғояга қарши чиққанидан кейин FIFA мазкур ташаббусдан воз кечган.
FIFA президенти сайлови 2027 йил март ойида Марокаш пойтахти Работ шаҳрида бўлиб ўтади. Ҳозирча Инфантино ўз номзодини расман қайтариб олмаган.
