Португалия терма жамоасининг собиқ сардори Луиш Фигу FIFA президенти Жанни Инфантинони қаттиқ танқид қилиб, унинг лавозимни тарк этиши кераклигини билдирди. Собиқ футболчининг фикрича, Жаҳон чемпионати тижорий ҳуқуқларининг бир қисмини хусусий инвесторларга сотиш ташаббуси футбол манфаатларига зид бўлган, деб ёзмоқда Daily Mail нашри.
Фигу нашрдаги ўз колонкасида Инфантинонинг ҳаракатларини фақат шахсий манфаат ва молиявий фойда билан изоҳлади. Унинг таъкидлашича, FIFA раҳбари Жаҳон чемпионати орқали ўзи ва яқин атрофидагиларни бойитишни кўзлаган.
«Мен FIFAдаги муаммолар ҳақида ўн минглаб сўз ёзишим мумкин. Аммо ечим битта — Инфантино кетиши керак. Футболда 20 йил профессионал фаолият юритдим ва кўплаб нохуш инсонларни учратдим. Бироқ сўнгги ўн кун ичида кўрганларим энг пасткаш, энг ёлғончи ва энг манфаатпараст хатти-ҳаракатлар бўлди», — деб ёзди Фигу.
Португалиялик афсона, шунингдек, FIFA раҳбарияти ушбу лойиҳани ташкилот аъзолари билан олдиндан муҳокама қилмаганини танқид қилди. Унинг фикрича, агар ташаббус ҳақиқатан ҳам футбол учун фойдали бўлганида, унинг барча жиҳатлари очиқ муҳокама қилиниши керак эди. Фигу хусусий инвестиция жамғармалари фақат юқори даромадни кўзлашини, бу эса келажакда FIFAнинг энг қиммат активи бўлган Жаҳон чемпионати устидан назоратни сусайтиришини таъкидлади.
Аввалроқ Инфантино FIFA мусобақаларининг тижорий ҳуқуқларини бошқариш учун янги компания ташкил этиш ва унга ташқи инвесторларни жалб қилиш режасини илгари сурган эди. Бироқ UEFA, AFC, CONCACAF ва CONMEBOLнинг кескин қаршилигидан кейин мазкур ташаббус бекор қилинди.
Айни пайтда Жанни Инфантино 2027 йил март ойида Марокашда бўлиб ўтадиган FIFA президентлиги сайловида яна номзодини қўйиш ниятида.
Мухлислар бу янгиликни Telegram’да муҳокама қилмоқда
Изоҳлар Telegram’да очилади