«У ерда ўзбеклар томонидан катта тарих ёзилди» — Шерзод Темиров

Ироқ чемпионатида ўз голлари билан рекорд қўйган ҳамюртимиз Шерзод Темиров яқинда клубини ўзгартирганидан хабарингиз бўлса керак. Легионеримиз «Эрбил» клубидан кетиб, Ироқнинг бошқа бир жамоаси - «Захо» билан шартнома имзолади.

Бир мавсумда 29 та гол урган ўзбек ҳужумчисини ўз сафида кўришни истаган жамоалар талайгина эди, бошқа қитъалардан ҳам Темировга жиддий қизиқишлар бўлди. Шунга қарамай, футболчимиз ўз қарорини эълон қилган ҳолда яна Ироқ чемпионатида қолишни маъқул топди, фақат бошқа жамоасида.

Темиров клубини ўзгартирганидан кейин ўзининг илк интервюсини Tribuna.uz журналистига берди.

- Шерзодбек, сиз «Эрбил» клубидан Ироқнинг бошқа бир жамоаси – «Захо»га ўтдингиз. Бунинг сабаби нима билан боғлиқ?

- Аввало, барча футбол мухлисларига салом! «Эрбил» клуби билан шартномам якунига етганди. У ерда ўзбеклар томонидан катта тарих ёзилди. Бу Ироқ лигасида ўзбекистонлик учун янада қизиқиш ортишига сабаб бўлади, деб ўйлайман. Янги жамоамга келсак, уларда катта мақсадлар борлигини айтишди ва келишув амалга ошди. Яхши таклифлар бўлса, юқори лигадан, бемалол ёрдам беришларини шартнома бандига ҳам киритдик. Бу томонлама ҳам менга маъқул келди. Энди тезроқ мослашиб, янги жамоамга ёрдам беришга тайёрланаман ва олдинда катта мавсум кутиб турибди.

- Олдингизда таклифлар кўп эди. «Захо» сизни яна нимаси билан қизиқтира олди?

- Қизиқиш бўлгани бу ажойиб. Лекин ўзингизни фаолиятингиз учун мос келадиган клубни ва яхши томонларини ҳам кўриб чиқишингиз керак. Масалан, сиз топ клубга бордингиз, эртага мослашиб кетиб, ўйин амалиётига эга бўлишингиз лозим. Футболда фақат клуб номи билан эмас, ўзингиз учун мос келадиган жамоага борганингиз маъқул, деб ўйлайман.

- Шунингдек, сизга Мисрнинг «Ал Ахли» клубидан ҳам қизиқиш борлигини эшитгандик. Бу музокараларгача етиб борганми?

- Ҳа, албатта. Бу рост. Улар мавсум тугамасиданоқ шартнома қилишимни хоҳлашган. Мен эса бундай таваккал қилишни хоҳламаганман. Тўғри, «Ал Аҳли» кучли ва катта клуб. Бироқ мен юқорида айтган гапимда қоламан!

- Сиз Ўзбекистон миллий жамоамиз билан жаҳон чемпионатига бордингиз. Бироқ 26 талик рўйхатга киритилмадингиз? Бу кайфиятингизга таъсир қилмадими?

- Миллий жамоа билан бирга жаҳон чемпионатига бориш - бу менинг орузим бўлган. Лекин бу мураббийнинг қарори. Сизга имкон бермасдан туриб чақириш менимча, ноҳақлик. Сиз бир давлатда ўзбеклар номидан рекорд қўйиб келасизу, аммо имконият олмайсиз. Бу тушунарсиз. Мен хафа эмасман, чақирилсам миллий жамоага бораман, чақирилмасам ўзимни клубимда қолиб, давом этаман, ишимни.

- Умуман олганда, мундиални ўз кўзингиз билан кўрдингиз. Таассуротлар қандай? Нима ўргандингиз?

- Бу мен учун катта тажриба бўлди. Ўйнамасам ҳам кўп нарсаларни ўзим учун билиб олдим. Сиз у ерда фақат дунёнинг топ ҳужумчиларининг ўйин услубини кўриш, ўйин услубига эътибор беришингиз ва улардан жуда кўп керакли нарсаларни ўрганишингиз мумкин.

- Янги клубингизда қайси рақамни танладингиз? Сизни қандай кутиб олишди?

- Мени жуда илиқ кутиб олишди. Улар мен учун 9-рақамни ўзлари танлаб қўйишган экан.

- «Эрбил» таркибида чемпионатда 34 та ўйинда 28 та гол урдингиз. Кубок мусобақасида эса 2 та ўйинда 1 та гол. Ироқ чемпионатининг энг яхши тўпурарига айландингиз ва энди сиздан ҳамма яна шундай сермаҳсулликни кутишмоқда. Айтинг-чи, «Захо»да ҳам шундай тўпурарликни кўрсата олишингизга ишончингиз комилми?

- «Захо» бу катта клублардан бири. Уларда доим мақсад билан ҳаракат қилишади. Мен янги жамоам учун ҳам боримни бераман. Ҳаммаси олдинда. Меҳнат, сабр билан ҳамма нарсани қилиш мумкин, Худо хоҳласа.

- Янги клубингизда ҳамма сиздан тўпурарликни кутаётгани сизга қўшимча босим юкламаяптими?

- Йўқ, нега? Биз бир жамоа ва оиламиз. Барча яхши натижаларга жамоам ёрдамида эришамиз.

- Ироқ чемпионатининг сизга энг ёққан ва ёқмаган томони қайси?

- Ироқ лигаси кўпроқ курашувчан лигалардан бири. Осиёда ўзини ўрнига эга. Бу лига курашувчанлиги учун ҳам кўпчиликка ёқади, хусусан менга ҳам. Ҳозирча ёқмайдиган тарафини кўрмадим.