Царукян: «Гейжи мен билан жангдан қочишга ҳаракат қиляпти. У қўрқяпти»

Арман Царукян UFC 331 турнирида Маурисио Руффини мағлуб этганидан сўнг, чемпион Жастин Гэйжининг у билан жанг қилишдан қочаётганини айтди.

«Гэйжи бирор марта ҳам менинг исмимни тилга олмаган. У қўрқяпти ва Руффининг мени нокаутга учратишини хоҳлаган.

Гэйжи бу жангдан қочишга ҳаракат қиляпти: Топурия билан жанг қилишни сўрашиэ ёки мен билан жанг учун 15 миллион доллар талаб қилишини айтиши... Акс ҳолда фаолиятини якунлашини билдириши мумкин. У бемаъни ўйинлар ўйнаяпти. Шунинг учун у ё камар учун мен билан жанг қилади ёки камарни бўшатиб, ёшроқ даъвогарларга имконият беради», — деди Царукян.

UFC 331 турнирида арманистонлик жангчи биринчи раундда Руффини тирсак зарбалари билан нокаутга учратди.