Спаллетти: «Ўйин яна 5 дақиқа давом этганида, ғалабани сақлаб қололмасдик»

«Ювентус» бош мураббийи Лучано Спаллетти Европа Лигаси умумий босқичининг 4-туридан ўрин олган АЗга (2:1) қарши баҳсдан сўнг ўз фикрларини билдирди.

«Мамнунман, чунки жуда кучли жамоага қарши яхши ўйин ўтказдик. Бугунги оқшомда ажойиб ўйнадик ва чиройли футбол намойиш этдик».

Ўйиннинг сўнгги дақиқалари ҳақида

«Европада барча жамоалар ўзига ишонч билан ҳаракат қилади ва бутун ўйин давомида суръатни пасайтирмайди. Агар учрашув яна беш дақиқа давом этганида, эҳтимол, ғалабани сақлаб қололмаган бўлардик. Учинчи голни уришимиз керак эди.

Бога ва Экҳатор? Уларда захирадан майдонга тушиб, ўйин боришига таъсир кўрсата оладиган сифатлар бор. Бироқ биз ҳаддан ташқари ортга чекиндик ва беллашувнинг сўнгги дақиқаларида яхшироқ ўйнашимиз мумкин эди.

Қайси футболчи бошқалардан кўра кўпроқ ёқди? Ҳеч кимни алоҳида ажратиб кўрсатмоқчи эмасман. Жамоанинг умумий руҳияти муҳим.

Биз бир қарорни ўз вақтида қабул қилмаганимиз сабабли тўп ўтказиб юбордик. Қарор қабул қилмаслик нотўғри қарор қабул қилишдан ҳам ёмон», — дея Спаллеттининг сўзларини келтиради Жанлука Ди Марцио.