Навоийнинг «Қизилқум» жамоаси етакчиларидан бири Шохруз Норхонов биринчи давра ўрталарида оёғидан жароҳат олиб сафдан чиқишга мажбур бўлди.
Ҳозирда футболчи даволаниш жараёнида. Албатта, унинг йўқлиги жамоасига охирги ўйинларда билинди. Tribuna.uz эса Шохруз билан боғланди.
- Шохруз айни пайтда ҳолатингиз қандай? Жароҳатдан кейин тикланиш қандай кечяпти?
- Худога шукр, ҳаммаси яхши ва режа асосида давом этяпти. Ҳозирга келиб ўзимни анча яхши ҳис қиляпман. Муолажалар бўляпти.
- Қачон майдонга қайтишингиз мумкин ва тўлиқ спорт формангизга қайтиш учун қанча вақт керак, деб ўйлайсиз?
- Ростини айтсам, иккинчи даврада тўлиқ спорт формамга қайтаман.
- «Қизилқум»да бош мураббий ўзгарди. Бунга қандай муносабатдасиз?
- Ҳа, жамоамизда бош мураббий ўзгарди. Лекин биз бу ишга аралаша олмаймиз. Чунки бу раҳбариятнинг қарори. Бизнинг ишимиз майдонга чиқиб футбол ўйнаш. Мураббийлик ишига аралашмаймиз.
- Жамшид Саидов бош мураббий этиб тайинлангач, у билан суҳбатлашдингизми?
- Ҳа, Жамшид ака қўнғироқ қилди ва биз гаплашиб олдик. Ҳозирги ҳолатим билан қизиқди, ҳол-ахвол сўради. Ўзи олдин ҳам «Қизилқум»да ишлаган. Биз ёрдам беришга тайёрмиз ва умид қиламанки, бу ўзгариш жамоамиз учун фақат ижобий томонга хизмат қилади.
- Ортда қолган 11 тур бўйича нималарни айта оласиз?
- Албатта, биз доим энг яхшисини хоҳлаймиз ва шунинг учун ҳаракат қиламиз. Тўғри, футболда ғалаба ва мағлубият ёнман-ён юради. Биз ўз имкониятимизни тўлиқ кўрсата олмадик. Лекин бундан яхшироғига муносибмиз. Чунки жамоамиз яхши шаклланган. Олдинда биринчи даврани яна 4 тури бор. Биз максимал равишда натижаларни яхшилашга ҳаракат қиламиз.
- 11 та ўйинда 1 та гол урдингиз. Ҳужумчи сифатида албатта бу кам. Ушбу ҳолат нима билан боғлиқ?
- Албатта, бу кам. Эътибор берган бўлсангиз, дастлабки 4-5 турда тўлиқ иштирок эта олмадим. Жароҳатлар ўз таъсирини кўрсатди. Лекин мен ҳар қандай ҳолатда ҳам жамоамга ёрдам беришга ҳаракат қиламан. Тезроқ соғайиб сафга қайтгач, яна «Қизилқум»нинг ғалабаларига ўз ҳиссамни қўшишга ҳаракат қиламан. Мен учун аввало гол уришдан кўра, жамоамнинг ғалабаси устун.
- Жаҳон чемпионатида миллий жамоамизнинг Колумбияга қарши ўйинини қандай баҳолайсиз?
- Бу бизнинг биринчи жаҳон чемпионатимиз. Шуни ҳисобга олганда, футболчиларимиз Колумбияга қарши жуда яхши ўйин намойиш қилишди. Биз жамоамиз билан фахрланамиз. Дебют ўйин учун ажойиб ҳаракат қилдилар. Рақиб кучли эди, йигитларимиз эса қўрқмасдан матонат билан тўп тепишди.
- Олдинда Португалияга қарши яна бир муҳим учрашув кутяпти. Ўйин олдидан нима дейсиз?
- Менимча, Колумбияга қарши ўйинга нистабан Португалия билан баҳсимиз у қадар мураккаб кечмайди. Тўғри, рақиб кучли, буни тан оламиз. Лекин йигитларимиз биринчи ўйиндан кейин ўзига бўлган ишончи янада ортди. Улар Португалияга қарши янада шиддатли ўйнай оладилар. Худо хоҳласа, ижобий натижага эришиш имкониятимиз бор.
