Сенегал футбол федерацияси (FCF) АҚШ аэропортида миллий жамоа футболчилари ва мураббийлари текширилгани акс этган видео юзасидан расмий баёнот берди.
Аввалроқ ижтимоий тармоқларда тарқалган видеодан сўнг айрим ОАВлар Сенегал миллий жамоаси аъзолари гиёҳванд моддалар мавжудлиги бўйича текширувдан ўтказилгани ҳақида хабар тарқатганди.
FCF эса бу маълумотлар ҳақиқатга тўғри келмаслигини маълум қилди.
Федерация баёнотига кўра, видеодаги жараён жамоанинг Сан-Антониога етиб келганидан кейин эмас, балки Роли аэропортидан АҚШ ичкарисига учиш олдидан амалга оширилган.
Қайд этилишича, Сенегал миллий жамоасини олиб келган автобус меҳмонхонадан тўғридан-тўғри аэропорт учиш-қўниш йўлагига йўл олган. Футболчилар ва делегация аъзолари самолётга чиқишдан аввал хавфсизлик ҳамда полиция назоратидан ўтган.
Федерация ушбу амалиётнинг асосий мақсади логистика жараёнларини соддалаштириш ва жамоанинг хусусий рейсга тезроқ чиқишини таъминлаш бўлганини таъкидлади.
Шунингдек, барча текширувлар амалдаги авиация хавфсизлиги қоидаларига тўлиқ риоя қилинган ҳолда ўтказилгани ва ҳеч қандай нохуш ҳолат қайд этилмагани маълум қилинди.
Маълумот учун, Сенегал миллий жамоаси 2026 йилги Жаҳон чемпионатининг I гуруҳида Франция, Норвегия ва Ироқ миллий жамоаларига қарши баҳс олиб боради.
