«Сўғдиёна» ёзги трансфер ойнаси доирасида сербиялик футболчи Петар Мичин билан шартнома имзолаганини расман эълон қилди.
27 ёшли вингер билан тузилган битим 2027 йил 31 декабрига қадар амал қилади.
Петар Мичин фаолияти давомида Сербиянинг «Войводина», «Чукарички», «Напредак» ва «Раднички Ниш» клублари сафида тўп сурган. Шунингдек, у Италиянинг «Удинезе» тизимида фаолият олиб борган ҳамда «Кево», Словакиянинг «Серед» клубларида ижара асосида ўйнаган.
Сербиялик футболчи 2023 йилдан буён Украинанинг «Зоря» Луганск клуби шарафини ҳимоя қилиб келаётганди. Мичин, шунингдек, Сербиянинг U-19 ва U-21 жамоалари сафида ҳам майдонга тушган.
Асосан чап қанот вингери сифатида ҳаракат қиладиган Мичин заруратга қараб ўнг қанот ва ҳужум ортида ҳам ўйнай олади.
Эслатиб ўтамиз, «Сўғдиёна» ёзги трансфер ойнасида таркибини фаол кучайтирмоқда. Аввалроқ жамоа россиялик марказий ҳимоячи Игор Голбан билан ҳам шартнома имзолаган эди.
