Руслан Жиянов: «Навбаҳор»нинг юбилей голини урганимдан хурсандман»

Суперлиганинг 12-туридан ўрин олган «Навбаҳор» – ОКМК (2:3) баҳсида наманганликларнинг юбилей 1600-голини урган Руслан Жиянов клуб матбуот хизматига ўз фикрларини билдирди.

«Навбаҳор» нафақат мамлакатимиз, балки Осиё қитъаси ҳамда собиқ иттифоқ давлатларида ҳам таниқли, Суперлигамизнинг «Пахтакор» билан биргаликда икки мунтазам иштирокчисидан бири, шунингдек, юртимизнинг энг совриндор клубларидан. Жамоанинг юбилей голи муаллифига айланиб, «Навбаҳор» тарихида қолганимдан хурсандман.

Юбилей гол борасида тўхталадиган бўлсам, уни жамоамизнинг ажойиб комбинациясидан сўнг урдим. Ўшанда рақиб жарима майдончаси яқинида тўпни жамоадошим Аббос Ғуломовдан қабул қилиб, жарима майдончаси ташқарисидан зарба йўллаб, дарвозани аниқ нишонга олган ҳолда ҳисобни очишга муваффақ бўлдим. Афсуски, баҳс якунида аламли тарзда мағлубиятга учрадик. Лекин бунга лойиқ эмасдик.

Энди 23 июл куни «Қизилқум»га қарши кечадиган беллашувда ғалаба қозониб, мухлисларга қувонч улашиш ниятидамиз.

ОКМК дарвозасига урган ушбу голим «Навбаҳор»нинг юбилей — 1600-голи эканлигини билганимдан кейин жуда хурсанд бўлдим. Ушбу мавсумда ишқибозларга қувонч улашиш, ижобий натижаларни қайд этиш учун барча имкониятимизни ишга соламиз. Фақат мухлислар бизни муносиб тарзда қўллаб-қувватлаб туришса бўлгани», — дея 25 ёшли вингернинг сўзларини келтиради клуб матбуот хизмати.