Португалия миллий жамоаси ҳужумчиси Криштиану Роналду Португалия футбол федерациясидан жазосини енгиллаштиришни сўради. У бунга футбол ривожига қўшган улкан ҳиссаси ва спортдаги хизматларини асос қилиб кўрсатган. Бу ҳақда Record нашри хабар берди.
Маълум қилинишича, Роналду ўз хатти-ҳаракатлари учун белгиланган жазони енгиллаштириш мақсадида учта омилни келтирган: «футбол ривожига қўшган улкан ҳиссаси», «спортдаги хизматлари» ва «иш бўйича ҳақиқатни аниқлашга ҳал қилувчи ҳисса қўшгани».
Федерация дастлабки икки важни инобатга олди, аммо учинчисини рад этди. Қарорда қайд этилишича, «фактларнинг катта қисми очиқ манбаларда мавжуд бўлгани сабабли узоқ ва мураккаб тергов ўтказиш зарурати йўқ эди».
Шунингдек, Роналду дисквалификацияга қарамай, ноябр ойидаги миллий жамоа ўйинларига чақирилиши мумкинлиги ҳақида хабар берилганди.
Эслатиб ўтамиз, «Ан Наср» ҳужумчиси бош мураббий Жорже Жезуш Миллатлар Лигасида Норвегияга қарши (2:1) учрашувда уни майдонга туширмаганидан сўнг жамоа қароргоҳини ўзбошимчалик билан тарк этганди. Бунинг учун федерация футболчини бир ойга дисквалификация қилган ва 255 евро жаримага тортганди.
Мухлислар бу янгиликни Telegram’да муҳокама қилмоқда
Изоҳлар Telegram’да очилади