Италиялик мутахассис Стефано Пиоли расман «Фиорентина» бош мураббийи этиб тайинланди. Бу ҳақда клуб матбуот хизмати хабар бермоқда.
Манбага кўра, томонлар ўртасида 2028 йилнинг ёзига қадар мўлжалланган шартнома имзоланган.
Пиоли аввал футболчи сифатида 1989-1995 йилларда «Фиорентина»да ўйнаган ва 2017-2019 йилларда жамоани бошқарганди.
«Мен жуда хурсандман, энди Стефано Пиоли «Фиорентина»нинг янги мураббийи. У билан илк дақиқалардаёқ тушундимки, у инсоний қадриятлари юқори бўлган ва бу жамоа учун бутун кучини беришга тайёр мураббий. Оила аъзоларим ва бутун «Фиорентина» билан бирга Стефанони қутлаб, унга клубимизда омад тилайман», – деди клуб президенти.
Қайд этилишича, Пиоли 14 июл куни мухлислар ва асосий жамоа билан учрашади, 16 июл куни эса матбуот анжуманида иштирок этади.
