«Манчестер Сити» клуби «Лестер Сити» вингери Жереми Монга билан шартнома имзолаганини эълон қилди.
Манбага кўра, «шаҳарликлар» 17 ёшли футболчи билан беш йиллик шартнома имзолади. Трансфер учун клуб тахминан 11,7 миллион евро тўлайди.
Шунингдек, келишувда яна қарийб 2,9 миллион евро миқдорида бонуслар ҳам кўзда тутилган.
«Менга «Манчестер Сити» қизиқиш билдиргани ҳақида эшитганимда, бу мен учун тўғри қадам эканини дарҳол англадим. Бу ерда бўлиш мен учун катта шараф ва жамоага қўшилганимдан жуда хурсандман», — дея Монганинг сўзларини клуб матбуот хизмати келтиради.
Ўтган мавсумда Монга «Лестер» таркибида 30 та ўйинда майдонга тушиб, бир гол урди ва икки голли узатма муаллифи бўлди. Transfermarkt портали маълумотларига кўра, футболчининг бозор қиймати 15 миллион евро атрофида баҳоланмоқда.
