«Барселона» ҳужумчиси Рафиня билан янги шартнома бўйича келишувга эришди. Битим футболчи ва клуб ўртасидаги амалдаги ҳамкорликни яна тўрт йилга узайтиришни назарда тутади.
Бу ҳақда италиялик инсайдер Фабрицио Романо маълум қилди. Унинг ёзишича, томонлар келишувнинг асосий шартларини тасдиқлаган ва ҳужжат тез орада расман имзоланади.
«Принципиал келишувга эришдик, у тез орада имзоланади», — деди «Барселона» спорт директори Деку.
Янги шартномага кўра, Рафинянинг каталонияликлар билан келишуви 2030 йил июнигача амал қилади. Шу тариқа бразилиялик ҳужумчи яқин йилларда ҳам «Барселона» сафида тўп тепишда давом этади.
Эслатиб ўтамиз, Рафиня 2022 йилдан буён «Барселона» сафида ўйнамоқда. Бразилиялик футболчи клубнинг асосий ҳужумкор футболчиларидан бири ҳисобланади.
