«Барселона» ҳужумчиси Рафиня Саудия Арабистони чемпионатидан олган таклифи ва уни рад этиш қарори ҳақида гапирди. Бразилиялик футболчининг сўзларига кўра, унга ва оиласига молиявий жиҳатдан жуда манфаатли таклиф келган, бироқ у фаолиятини Каталония клубида давом эттиришга қарор қилган.
«Менга ва оиламга ҳаётимизни ўзгартириб юбориши мумкин бўлган жуда фойдали таклиф келган эди. Таклифдаги рақамлар жуда жозибали эди. Аммо клуб менинг қолишимни хоҳлашини ҳис қилсам, мен имкон қадар узоқ вақт шу ерда қолишни истайман. «Барселона» ҳаётимнинг мазмунига айланди», — деди Рафиня RАC1 нашрига берган интервюсида.
29 ёшли футболчи ушбу мавсумда «Барселона» сафида барча мусобақаларда 7 та баҳсда майдонга тушди. Рафиня ушбу баҳсларда 11 та гол уриб, яна 3 та голга узатма берди.
Бразилиялик ҳужумчининг юқори спорт формаси унинг жамоа учун муҳим футболчилардан бири эканини кўрсатмоқда. Аввалроқ «Барселона» Рафиня билан амалдаги шартномани узайтиришга ҳаракат қилаётгани ҳақида хабарлар тарқалганди. Шу билан бирга, Саудия Арабистони клублари футболчига юқори маош таклиф қилишга тайёр экани айтилганди.
Рафинянинг «Барселона» билан амалдаги меҳнат шартномаси 2028 йил июнигача мўлжалланган. Футболчи эса берган баёнотида Каталония клубида имкон қадар узоқроқ қолиш истагини очиқ билдирди.
Маълумот учун, Рафиня 2022 йил ёзида «Барселона» сафига қўшилган ва шундан буён жамоанинг ҳужум чизиғидаги асосий футболчилардан бирига айланган.
