УEФА ва КОНКАКАФ ФИФАдан 211 та миллий федерациянинг ҳар бирига $10 миллиондан тўлашни талаб қилди. Бу ҳақда L’Équipe хабар берди.
УEФА президенти Александр Чеферин ва КОНКАКАФ раҳбари Виктор Монталяни ФИФА президенти Жанни Инфантинога мактуб йўллаган.
Унда ФИФА 2023–2026 йиллар сиклини қарийб $6 миллиард захира билан якунлаётгани қайд этилган. Шу сабабли федерацияларга 2027–2030 йиллар сикли давомида камида $10 миллиондан ажратиш адолатли экани таъкидланган.
Бу барча 211 та миллий федерация учун жами қарийб $2,1 миллиард маблағни ташкил этади.
Маълумот учун, УEФА ва КОНКАКАФ ФИФА раҳбариятининг бошқарув услубидан норозилигини ҳам билдирган. Ушбу ташаббус жаҳон футболидаги бошқарув масалалари бўйича келишмовчиликлар кучайган бир пайтга тўғри келмоқда.
