«Нефтчи»нинг таҳлилчи мураббийи жамоа билан хайрлашди

«Нефтчи» мураббийлар штаби аъзоси, таҳлилчи (аналитик) мутахассис Факундо Стик ўзаро келишувга кўра жамоадаги фаолиятини якунлади.

Бунга аргентиналик мутахассиснинг Европанинг топ лигасига йўл олиши сабаб бўлди. Унинг янги манзили А Сериянинг «Каляри» бўлиши кутилмоқда.

«Факундо Стик жамоамиз сафига мавсум аввалида келиб қўшилган бўлиб, январ ойидан буён бош мураббий Исломбек Исмоилов ва мураббийлар штабига аналитика йўналишида яқиндан ёрдам бериб келди. Унинг замонавий футболга бўлган қарашлари, рақибларни таҳлил қилишдаги тажрибаси ҳамда ўз ишига бўлган профессионал ёндашуви жамоамизнинг кўплаб муваффақиятларида муҳим ўрин тутди.

Мутахассис март ойида жамоамиз билан биргаликда Ўзбекистон суперкубогини қўлга киритиб, клубимиз тарихидаги ёрқин саҳифалардан бирига ўз ҳиссасини қўшди. Қисқа вақт ичида у нафақат малакали мутахассис, балки жамоамизнинг ҳурматга сазовор инсонларидан бирига айланди.

Факундо Стикка клубимиз номидан фидокорона меҳнати, профессионаллиги ва жамоамиз ривожи йўлида қўшган ҳиссаси учун самимий миннатдорлик билдирамиз.

Келгуси фаолиятида улкан муваффақиятлар, янги зафарлар ва ёрқин натижалар тилаб қоламиз!

Раҳмат барчаси учун, Факундо!» — дейилади клуб хабарида.