«Манчестер Юнайтед» раҳбарияти жамоа сардори Бруно Фернандешни сотиш вариантини кўриб чиқмоқда. Футбол Инсидер журналисти Пит O'Руркнинг маълум қилишича, бунга футболчининг клубни танқид қилгани сабаб бўлган.
Манбага кўра, Манчестер клуби 32 ёшли португалиялик яримҳимоячи билан ҳамкорликни тугатмоқчи, аммо ундан трансфер пули олишни мақсад қилган. Шу сабабли раҳбарият футболчи билан шартномани узайтириб, мавсум якунланганидан кейин уни сотиш вариантини кўриб чиқмоқда.
Фернандешнинг «Манчестер Юнайтед» билан амалдаги шартномаси 2027 йилнинг ёзида якунига етади. Агар келишув узайтирилмаса, клуб футболчини шартномаси тугашидан олдин сотиш масаласини ҳал қилиши керак бўлади.
Португалиялик футболчи ушбу мавсумда барча мусобақаларда 11 та баҳсда майдонга тушиб, тўртта гол урди ва битта голли узатмани амалга оширди.
Маълумот учун, Тransfermarkt портали 32 ёшли Фернандешнинг бозор қийматини 35 миллион еврога баҳоламоқда.
