«Реал» ҳужумчиси ва Франция миллий жамоаси аъзоси Килиан Мбаппе Хитой халқидан узр сўраб, расмий баёнот эълон қилди. Футболчи аввалги интервюсида билдирган фикрлари Хитойда салбий муносабатга сабаб бўлганидан афсусда эканини таъкидлади.
«Яқинда берган интервюм давомида ўзим тасвирланган суратга муносабат билдирдим. Изоҳимни ўйламасдан айтган эдим. Энди эса бу гапларим Хитойдаги ва бутун дунё бўйлаб яшаётган хитойлик жамоалар вакилларининг кўнглига текканини тушуняпман.
Сўзларимдан ранжиган барча инсонлардан узр сўрайман. Бу менинг мутлақо ниятимда бўлмаган. Мен Хитой халқи ва унинг тарихига чуқур ҳурмат билан қарайман ҳамда юз берган воқеадан чин дилдан афсусдаман», — дейилади Мбаппенинг ижтимоий тармоқдаги баёнотида.
Можарога футболчининг интервю давомида ўзи иштирок этган мем ҳақидаги изоҳи сабаб бўлган. Мбаппе унда унинг юзи «қандайдир йигит — шекилли, хитойлик диктатор» тасвирига жойлаштирилган суратни кулгили деб атаган. Тахминларга кўра, гап Хитойнинг собиқ раҳбари Мао Сзедун ҳақида борган.
Маълумот учун, ушбу изоҳ ортидан Хитойнинг Dongpeng ва Меnginu компаниялари Мбаппе билан ҳомийлик ҳамкорлигини тўхтатгани ҳақида хабар берилган эди.
