«Милан» яримҳимоячиси Лука Модрич ўтган мавсумда жамоанинг Чемпионлар лигаси йўлланмасини қўлдан чиқаришига нима сабаб бўлганини тушунтирди. Унинг фикрича, жамоа чемпионлик учун курашиш имконияти камайганини англагач, футболчилар хотиржамликка берилиб кетган.
«Ўтган мавсум мен учун яхши ўтди, аммо уни истагандек якунлай олмадик. Асосий мақсадимиз Чемпионлар лигасига чиқиш эди, афсуски, бунинг уддасидан чиқа олмадик. Мавсум сўнгидаги муҳим ўйинларда жароҳат туфайли жамоага ёрдам бера олмаганим мени қаттиқ ранжитди. Шу сабаб қолишга қарор қилдим ва бу мавсум анча яхши натижаларга эришишни хоҳлайман», — деди Модрич.
La Gazzetta dello Sport нашрининг ёзишича, 39 ёшли футболчи фаолиятини давом эттириш қарорига ўтган мавсумдаги муваффақиятсизликлар эмас, балки клуб ва мухлисларнинг ишончи таъсир қилганини таъкидлаган. Унинг айтишича, «Милан» раҳбарияти уни жамоада қолишини истаган ва бу қарор қабул қилишда ҳал қилувчи омил бўлган.
Модрич жамоа ўтган мавсумда ўз хатоларидан хулоса чиқариши шартлигини ҳам қайд этди. Унинг сўзларига кўра, «Лацио»га қарши мағлубиятгача «Милан» Скудетто учун кураш олиб борган. Бироқ чемпионлик имконияти пасайгач, футболчилар Чемпионлар лигаси йўлланмаси кафолатланган, деган хато тасаввурга борган.
«Эҳтимол, айнан шу пайтда бироз бўшашдик. Чемпионлик қийинлигини тушунгач, Чемпионлар лигасига чиқиш барибир таъминланган, деб ўйладик. Энг катта хатомиз ҳам шу бўлди. Энди бу сабоқдан тўғри хулоса чиқариб, янги мавсумни муваффақиятли якунлашимиз керак», — дея қўшимча қилди хорват яримҳимоячиси.
Эслатиб ўтамиз, «Милан» ўтган мавсум “A” Серияни бешинчи ўринда якунлади ва унга Чемпионлар лигаси йўлланмаси учун атиги бир очко етмай қолди.
