24 ёшли футболчи Сафван Аваэ Таиланддаги Golok FA Cup 2026 ҳаваскорлар турнири учрашуви вақтида яшин уруши оқибатида ҳалок бўлди.
Фожиа 4 август куни Наратхиват вилоятининг Сунгайколок шаҳрида юз берди. Учрашув вақтида кучли ёмғир ва шамол билан бирга момақалдироқ бошланган. Шундан сўнг яшин футбол майдони ҳудудига урилган.
Турнирда «Абу x Нонг Сирин» жамоаси сафида иштирок этган Аваэ оғир жароҳатлар олди. Шифокорлар футболчининг ҳаётини сақлаб қолишга ҳаракат қилишди, аммо у кейинроқ вафот этди.
Маҳаллий ОАВ маълумотларига кўра, яшин уруши оқибатида яна бир нечта киши жароҳатланган. Турли манбалар 8–10 нафар шахс жабрлангани ҳақида хабар бермоқда.
8 нафар футболчи шифохонага ётқизилган, Малайзиядан келган бир футболчи даволанишни ўз юртида давом эттиришга қарор қилган, яна икки киши тиббий кўрикдан ўтмоқда.
Аваэ аввал «Паттани»да ўйнаган, фожиадан бироз олдин эса «Яла» клуби билан шартнома имзолаганди. Жамоа футболчининг оиласига ҳамдардлик билдирди, мухлислар ва Таиланд футболи вакиллари ижтимоий тармоқларда унинг хотирасини ёдга олди.
