Италия футболи афсонаси Жанфранко Дзола мамлакат терма жамоаси тизимига расман қайтди. У энди Италия футбол федерацияси (FIGC) қошида ёшлар футболини ривожлантиришга қаратилган лойиҳаларни мувофиқлаштириш билан шуғулланади.
FIGC президенти Жованни Малагонинг маълум қилишича, Дзоланинг номзоди Роберто Манчини ва Клаудио Раниери билан биргаликда муҳокама қилинган ва унинг тажрибаси ҳамда ёш футболчилар билан ишлаш борасидаги фаолияти муҳим омил бўлган. Федерация раҳбари Дзоланинг харизмаси, профессионал тайёргарлиги ва сўнгги йилларда «Лега Про»да амалга оширган ишлари Италия футболининг келажагини барпо этишда катта аҳамиятга эга эканини таъкидлади.
Дзоланинг терма жамоага қайтиши ҳақидаги илк ишоралар FIGC Федерал кенгашининг сўнгги йиғилишидаёқ янграган эди. Ўшанда Малаго терма жамоа штабида яна бир муҳим шахс иш бошлашини айтган ва Дзолани асосий номзодлардан бири сифатида тилга олган. Кейинчалик у собиқ ҳужумчининг “C” серия ёшлар лойиҳасидаги фаолияти юқори баҳоланганини яна бир бор қайд этди.
Жанфранко Дзола янги вазифаси билан бир қаторда «Лега Про» вице-президенти сифатидаги фаолиятини ҳам давом эттиради. У янги тайинловдан мамнун эканини билдириб, Италия футболининг ривожи учун бор кучини сафарбар қилишга тайёрлигини айтди.
«Президент Малагога менга ишонч билдиргани учун миннатдорчилик билдираман. Бу “Лега Про”да клублар ва федерация билан биргаликда амалга оширган ёшлар лойиҳасининг самарасига берилган баҳодир. Энди Италия футболи манфаати йўлида, айниқса, янги истеъдодларни кашф этиш ва уларни ривожлантириш учун астойдил меҳнат қиламан», — деди Дзола.
