«Мец» — «Фортуна» ўртоқлик ўйинида юзага келган жанжалда аёл ҳакам жароҳат олди

«Мец» ва «Фортуна» (Ситтард) жамоалари ўртасидаги ўртоқлик ўйини вақтида ҳакам Матилда Демонсэ жароҳат олди.

Беллашувнинг 39-дақиқасида футболчилар ўртасида оммавий жанжал келиб чиқди. Бош ҳакам сифатида ишлаётган Демонсэ можаро иштирокчиларини ажратишга уринди, аммо тартибсизлик пайтида майсага йиқилди.

26 ёшли ҳакам бир неча дақиқа қўлини ушлаб, майдонда ётди. Унга ёрдам бериш учун ассистентлар, шифокорлар ва хавфсизлик хизмати ходимлари етиб келишди.

Ўйин давом эттирилганидан сўнг Демонсэ маълум вақт лайнсмен вазифасида ишлашни давом эттирди, аммо танаффусдан кейин майдонга қайтмади.

Баҳсдан кейин футболчилар Демонсэдан узр сўрашди, у эса стадионни «Мец» футболкасида тарк этди.

Кейинроқ маълум бўлишича, аёл ҳакамда енгил мия чайқалиши бўлган.