«Манчестер Юнайтед» Жим Ретклифф клуб футбол операцияларини назорат қила бошлаганидан кейин харажатларни қисқартириш дастурини давом эттирмоқда. Тhe Telegraph клубнинг 2025/26 йилги тўлиқ молиявий ҳисоботига таяниб, сўнгги икки йилда 322 нафар ходим ишдан кетганини маълум қилди.
Қайд этилишича, энг катта қисқариш клубнинг ички медиа ва тижорат бўлимларида кузатилган. Ушбу бўлимларда ходимлар сони мос равишда 45 ва 44 фоизга камайган. Маъмурий ва унга яқин йўналишларда, жумладан чипталар билан ишлаш бўлимида 161 та иш ўрни қисқартирилган.
Футбол йўналишида эса яна 60 нафар ходим клубни тарк этган. Улар орасида скаутлар ва академия мураббийлари ҳам бор.
Ретклифф 2024 йил февралида клубнинг футбол операциялари устидан назоратни қўлга киритганидан сўнг кенг кўламли харажатларни қисқартириш дастурини бошлаган. Унинг таъкидлашича, тежалган маблағларнинг бир қисмини таркибга инвестиция қилиш мумкин.
Маълумот учун, «Манчестер Юнайтед»нинг операцион молиявий натижаси 2024 йилдаги қарийб 70 миллион фунтлик зарардан 2025/26 йилги мавсум якунида 22,6 миллион фунтлик фойдагача яхшиланган. Клубнинг иш ҳақи харажатлари ҳам 302 миллион фунтгача тушган.
Шунга қарамай, клуб молиявий йилни солиқлардан олдинги 47 миллион фунтлик зарар билан якунлаган ва кетма-кет еттинчи йил зарар кўрган.
Эслатиб ўтамиз, клубнинг умумий қарзи, жумладан трансферлар бўйича мажбуриятлар, 1,1 миллиард фунтдан ошган. Ёзги трансферлар учун эса «Манчестер Юнайтед» қўшимча 90 миллион фунт қарз олган.
