«Ливерпул» клуби «Брайтон» вингери Янкуба Минтени ўз сафига қўшиб олиш бўйича музокараларни давом эттирмоқда. Бу ҳақда Liverpool Echo нашри хабар берди.
Манбага кўра, мерсисайдликлар гамбиялик 22 ёшли футболчи бўйича учинчи таклифни тайёрламоқда. Аввалроқ «қизиллар» Минте борасида 50 ва 60 миллион фунтлик таклифлар билан чиққан, аммо ҳар иккиси ҳам рад этилган. Қайд этилишича, «Брайтон» эса футболчи учун 70 миллион фунтдан юқори маблағ талаб қилмоқда.
Футболчининг «чайкалар» билан амалдаги шартномаси 2029 йил ёзига қадар амал қилади. Янкуба ўтган мавсумда барча турнирлар доирасида 36 та учрашув, 3 та гол ва 4 та ассист қайд этган.
