Лапорта Алварес трансфери ҳақида: «Ҳеч кимнинг куйига рақсга тушмаймиз. Таклифимиз муддати чегараланган»

«Барселона» президенти Жоан Лапорта Хулиан Алварес бўйича таклифнинг амал қилиш муддати чекланганини айтди.

Аввалроқ «Атлетико» ҳужумчиси клубни тарк этиш истаги борлигини билдирган эди: «Менимча, барча учун энг яхши вариант — трансфер. Ўз орзумни амалга оширмоқчиман».

Кейинроқ Мадрид клуби аргентиналик футболчи билан музокаралар олиб боргани учун «Барселона» устидан FIFA ва Испания футбол федерациясига (RFEF) шикоят қилди.

«Биз ҳеч кимнинг куйига рақсга тушмоқчи эмасмиз. Бу ерда ритмни ўзимиз белгилаймиз. Таклиф бердик, аммо у муддатсиз эмас. У қанча вақт кучда бўлишини кўрамиз. Биз мураббий ва спорт бўлими сўраган футболчи билан шартнома қилиш истагимизни билдирдик. Хулиан бизга жуда ёқади ва, менимча, у — ажойиб футболчи.

«Атлетико» билан муносабатларимиз жуда яхши. Бизнинг таклифимиз сабаб тушунмовчилик юзага келди ва мен уларга ҳаммасини тушунтирдим. Биз босим ўтказмадик. Мен фақат уларда муқобил вариант пайдо бўлганидан кейин ҳам таклифимиз кучда қолишини айтдим. Ҳозирча бу масала кейинги босқичга ўтгани йўқ», — дея Лапортанинг сўзларини келтиради Marca.