Аргентина — Швейцария ўйини вақтида Буэнос-Айресда 7 киши юрак хуружини ўтказди, улардан бири вафот этди

2026 йилги Жаҳон чемпионати чоракфиналидан ўрин олган Аргентина ва Швейцария (3:1) ўртасидаги ўйин вақтида 51 ёшли мухлис инфарктдан вафот этди.

Воқеа жойига етиб келган тез ёрдам ходимлари эркакни жонлантиришга уринишган, аммо кейинчалик унинг вафот этганини қайд этишган.

Ambito нашри Буэнос-Айрес шошилинч тиббий ёрдам хизмати (SAME) маълумотларига таяниб хабар беришича, ўйин пайтида ва ундан кейинги байрамлар давомида пойтахтда яна олти киши юрак хуружи ҳамда бошқа шошилинч ҳолатларни бошдан кечирган.

Қайд этилган ҳолатлар орасида кўкракда оғриқ, нафас олиш қийинлашиши, ҳушдан кетиш ва ўткир коронар синдромга хос белгилар бўлган.

45 ёшли эркак кўкрагида оғриқ, нутқ бузилиши ва бир қўлининг уюшишидан шикоят қилганидан сўнг шифохонага олиб кетилган. Ярим соат ўтиб, 41 ёшли эркак ҳушини йўқотган. Унга воқеа жойида ёрдам кўрсатилган ва шифохонага ётқизиш шарт бўлмаган. Шунингдек, юрак касаллиги бўлган 86 ёшли ҳушсиз ҳолда топилган аёлга ҳам тиббий ёрдам кўрсатилган.

Шифокорларнинг иши бутун тун бўйи давом этган. Юрак соҳасида оғриқ ва нафас олиш қийинлашишидан шикоят қилган 74 ёшли аёл шифохонага олиб борилган. Кўкрагида оғриқ бўлган 48 ёшли эркак ҳам шифохонага ётқизилган.

Охирги қайд этилган ҳолат нафас олиши бузилган 38 ёшли аёл билан боғлиқ бўлиб, у ҳам шифохонага етказилган.