Швейцария миллий жамоаси ҳимоячиси Мануэл Аканжи ЖЧ 1/4 финали доирасида Аргентинага қарши баҳсдаги (3:1) ҳакамликни танқид қилди.
Эслатиб ўтамиз, ўйиннинг 72-дақиқасида бош ҳакам Жоау Педру Пинейру VAR аралашувидан кейин швейцарияликлар форварди Эмболога симуляция учун иккинчи сариқ карточка кўрсатиб, уни майдондан четлатди.
«Ўйин якунлангач, хаёлимдан бир фикр ўтди. Мен жамоам билан фахрланаман. Аргентина очиқ ўйинда деярли бирорта имкониятга эга бўлмади. Афсуски, Хулиан Алвареснинг голи тасодиф бўлмади.
Одатда ҳакамликдан норози бўлиб, эътироз билдириб ўтирмайман, аммо бугун барчаси рақиб фойдасига ҳал бўлаверди. Ҳеч қачон бу каби бир томонлама ўйинда иштирок этмаганман. Рақибнинг бирорта симуляцияси жазоланмади. Асосий вақт давомида аргентиналикларга бирорта сариқ карточка кўрсатилмади. Бироқ Брил [Эмболо] билан вазиятда у иккиланмай сариқ карточкани чўнтагидан олди. Биз бир киши кам бўлиб ҳам қўлимиздан келганини қилдик. Аммо, албатта, Брил — жамоанинг муҳим бўлаги, уни қўллаб-қувватлаймиз», — дея Аканжи сўзларидан иқтибос келтирди Blick.
