Кейн: «Олтин тўп»га даъвогарлар қаторидан эканлигимдан хурсандман. Якуний қарор эса менга боғлиқ эмас»

«Бавария» клуби ва Англия миллий жамоаси ҳужумчиси Ҳарри Кейн Майкл Оуэн уни бу йилги «Олтин тўп» соҳиби сифатида кўришни хоҳлаётганига муносабат билдирди.

Агар Кейн ушбу совринни қўлга киритса, «Олтин тўп»ни олган бешинчи англиялик футболчи ва 2001 йилдан буён Майкл Оуэндан кейинги биринчи инглиз бўлади. Оуэн Ҳаррига овозли хабар юбориб, «бизнинг эксклюзив кичик клубимизга қўшилишингга умид қиламиз» деб айтди.

«Албатта, ўтказган мавсумимдан ниҳоятда фахрланаман.

Майкл каби футболчилардан бундай сўзларни эшитиш менга катта фахр бағишлайди, чунки болалигимда унинг ўйинларини кўриб улғайганман ва Англия миллий жамоасининг катта мухлиси бўлганман.

Яқиндагина мен ҳам профессионал футболчи бўлишни орзу қилган оддий мухлис эдим. Энди эса мана шу ердаман, совринларни қўлга киритяпман, «Олтин тўп» ҳам шулардан бири.

Албатта, энди бу қарор менинг қўлимда эмас. Ҳаммаси овоз берувчилар ва қарор қабул қиладиган инсонларга боғлиқ. Бу мавсум ҳозиргача фаолиятимдаги энг яхшиси бўлди. Кейин нима бўлишини кўрамиз.

Қизиғи шуки, ҳозир мен аллақачон кейинги мавсум ҳақида ўйлаяпман. Янада яхшироқ бўла оламанми? Ўйинимни такомиллаштира оламанми? Шу билан бирга, қилган ишларимни ҳам қадрлашни истайман.

Футболдаги гапларга келсак, турли футболчилар фойдасига жуда кўп фикр ва далиллар бор. Одамлар кимнидир яхши кўради. Ёқтирганларини «у тезкор», «унинг футбол интеллекти жуда юқори» ёки «вазиятлардан ажойиб фойдаланади», — деб ҳисоблашади.

Шунинг учун менимча, футболни ўзига хос қиладиган нарса ҳам шу — барча баҳс-мунозаралар, жумладан, «Олтин тўп» борасидаги баҳслар ҳам.

Ушбу соврин учун даъвогарлар қаторида эканимдан хурсандман. Нима бўлишини кўрамиз», — дея Кейннинг сўздарини келтиради TNT Sports.