«Бунёдкор» клуби ҳамон мағлубиятли сериясини давом эттирмоқда. Иван Бошкович клубга бош мураббий сифатида қайтган бўлса-да, иккинчи учрашувда ҳам имконият бой берилди. Бу сафар Қаршида «Насаф»га 3:0 ҳисобида енгилдилар. Ўйиндан кейин «Бунёдкор» устози Иван Бошкович матбуот анжуманида қатнашди.
— Бугун яхши формада эканимизни кўрсатдик. Айрим жиҳатларда ниманидир ўзгартиришга ҳаракат қилдик. Жамоа муносиб қаршилик кўрсатди. Энг муҳими, ўйиндан тушиб қолмадик. Йигитлар охиригача ҳаракат қилишди ва бу менга ёқди. Биз бу ҳақда гаплашгандик: таслим бўлмаслигимиз керак. Қўшимча вақтда ҳам рақибга қарши муносиб курашдик, ўз томонимиздан ҳам вазиятлар ярата олдик. Ҳисобни ўзгартириш учун имконият пайдо бўлганида, рақиб бизни хатомиз учун жазолади.
Албатта, биз таваккал қилишга мажбур бўлдик. Баъзи ҳолатларда бу ўзини оқлади, баъзида эса йўқ. Лекин жамоа қисқа вақт ичида рақибни жазолаш, ортга қайтиш ва яна вазиятлар яратиш учун бор имкониятини ишга солди.
Ғалаба билан рақибни табриклайман. Биз эса таслим бўлмаймиз. Ҳали вазиятни тўғрилаш имконияти бор.
— Уч йил олдин ҳам «Бунёдкор»да ишлаган эдингиз. Энди яна жамоага қайтдингиз. Нима учун айнан ҳозир бу таклифни қабул қилишга қарор қилдингиз?
— Уч йил олдин ҳам «Бунёдкор»да ишлаганман. Мен учун бу жамоада иккинчи марта ишлаш — мураббий сифатида яна бир бор ўсиш, ўзимни синаб кўриш имконияти. Шунинг учун таклифни қабул қилиш борасида иккиланмадим.
Албатта, клубда ҳозир вазият осон эмас. Лекин мен шикоят қилишни эмас, ишлашни хоҳлайман. Бундай вазиятларга аввал ҳам дуч келганман. Мен ишонаманки, ўз меҳнатим билан клубга ёрдам бера оламан. «Бунёдкор» аввалги даражасига қайтиши керак. Бу ерда жуда яхши академия бор ва қанча-қанча футболчилар айнан шу клубда етишиб чиққанини ҳамма яхши билади. «Бунёдкор» ўзбек футболи учун катта аҳамиятга эга клуб.
Мен ҳам бу клуб билан боғлиқ инсонман, «Бунёдкор»да ўсганман. Шунинг учун клубга нисбатан меҳрим бор. Қандай қийин вазият бўлмасин, «Бунёдкор» яна ўзбек футболида юқори ўринларга қайтишига ишонаман. Менинг бу ерга келишимга асосий сабаблардан бири ҳам шу — клубга бўлган меҳрим. Қийинчиликлардан қўрқмаслик керак. Аксинча, қийин вазият инсонни янада кучли қилади. Ҳозирги асосий вазифамиз — жамоани Суперлигада сақлаб қолиш. Бунинг учун бор кучимизни ишга соламиз. Эртанги кун қандай бўлишини тақдир кўрсатади. Лекин мен ишонаманки, барчаси яхши томонга ўзгаради.
«Бунёдкор»га қайтиб келганимдан кейин молиявий муаммолар борлигини эшитдим. Лекин мен футбол мураббийиман. Менинг вазифам — ишлаш. Биз бу ишни ташлаб қўймаймиз, аксинча, футболчилар билан бирга охиригача ҳаракат қиламиз. Раҳбарият билан биргаликда жамоанинг майдонда ўзини муносиб кўрсатиши учун барча имкониятларни ишга соламиз. Ҳозир эса бошқа масалаларга эмас, футболга тўлиқ эътибор қаратишимиз керак.
Вазият жуда қийин, ҳатто жуда оғир. Лекин ҳозир барча эътиборимизни футболга қаратамиз. Қолган масалалар ҳақида кейинроқ гаплашиш мумкин.
— Ойлик маошини олмаётган, оиласига маош олиб бора олмаётган футболчиларни бошқариш қийин эмасми? Улар сиз берган тактик кўрсатмаларни қай даражада бажара оляпти?
— Энг аввало, шикоят қилмаслик керак. Мен футболчилардан доимо бир нарсани талаб қиламан — майдонга чиққанда бор имконияти билан максимал даражада ҳаракат қилиш. Кимдир ўз имкониятининг энг юқори чегарасида ҳаракат қилди. Кимдир эса жамоада қолишни истамади ва кетди. Улар хотиржамлик билан кетишди. Қолган футболчилар эса футбол ўйнаш учун қолишди, шикоят қилиш учун эмас.
Бугун йигитларнинг аксарияти яхши ўйнагани кўриниб турди. Биз олдимизга қандай вазифа қўйган бўлсак, шу вазифани бажаришга ҳаракат қиляпмиз. Менимча, инсон ҳаётида қийинчиликлар пайдо бўлса, у ҳатто уч баробар кўпроқ ўсиши мумкин. Қийинчиликлар — ҳар бир инсон учун ўзини ривожлантириш ва янада кучли бўлиш имконияти. Шунинг учун бугун футболчилар характер кўрсатишди, таслим бўлишмади. Бу жуда муҳим. Менимча, биринчи бўлимда жамоа ўзининг энг яхши ўйинларидан бирини кўрсатди.
Биринчи бўлимда ҳаяжон ҳам бор эди. Балки айрим нарсалар ўхшамаётгани учун шундай бўлгандир. Танаффусдан кейин эса футболчилар анча дадил ва эркин ҳаракат қилишди. Ҳозир бизда йўқотадиган нарса деярли қолмади. Биринчи бўлимдан кейин фақат ниманидир ютишимиз мумкин эди, холос. Шунинг учун футболчилар иккинчи бўлимда янада тўлиқроқ ҳаракат қилишди. Албатта, хатолар ҳам бўлди. Ўтишларда ҳам таваккалчиликлар кузатилди. Лекин жамоа бор кучини ишга солди.
— «Бунёдкор»да аввалги мураббийлар штаби жамоани тарк этди. Сиз жамоага келганингиздан кейин ўз ёрдамчиларингиздан иборат янги мураббийлар штабини шакллантира оласизми?
— Албатта, бу масала жиддий. Ҳозирча биз ишлашда давом этамиз. Мен жамоага ва ўз ишимга ишонаман. Барчаси яхши бўлади, деб умид қиламан», - дея Бошковичнин сўзларини келтиради Tribuna.uz мухбири.
