Пике: «Тарихан қарасак, ҳакамлар «Реал» фойдасига кўпроқ хато қилган»

«Барселона»нинг собиқ ҳимоячиси Жерар Пике ижтимоий тармоқларда «Реал» мухлисининг изоҳига жавоб қайтарди.

TikTok фойдаланувчиларидан бири шундай ёзди: «Барселона»нинг ғалаба қозониш учун фақат битта йўли бор, биз эса бу йўлни биламиз».

Пике унга қуйидагича жавоб берди:

«Ҳа, «Барселона»нинг ғалаба қозониш учун фақат битта йўли бор — яхши футбол ўйнаш. Биз айнан шу жиҳатимиз билан танилганмиз. Биз жуда чиройли футбол намойиш этиб, кўплаб чемпионликлар, кўплаб Чемпионлар лигаси совринлари ва треблларни қўлга киритганмиз.

Ҳакамлик масаласини эса доим сизлар кўтаргансизлар. Агар хоҳласанг, «Ювентус»га қарши Чемпионлар лигаси финалини эслатиб қўйишим мумкин: Миятовичнинг голи қоидалар бузилган ҳолда урилган.

Ёки «Атлетико»га қарши икки финалдан бирини олайлик: Серхио Рамоснинг голида офсайд бор эди.

Ҳакамлик хатолари кўп бўлади. Аммо тарихий нуқтайи назардан қараганда, улар барибир «Реал» фойдасига бироз кўпроқ бўлган.

Қолган масалаларда эса сенда ҳаммаси яхши бўлишини умид қиламан. Маҳкам қучоқлаб қоламан ва кунингни яхши ўтказишингни тилайман», — деб ёзди Пике.