«Интер» клуби собиқ ҳужумчи Сандро Маццоланинг 83 ёшида вафот этганини маълум қилди.
«Сандро Маццола тарихдаги энг буюк футболчилардан бири эди. Нафақат «нерадзурри» тарихида, балки бутун дунё бўйича энг юқори ўринларда тилга олинарди.
У «Интер» тарихининг бир қисми эди, клубга болалигида келган ва уни ҳеч қачон тарк этмаган», — дейилади клуб баёнотида.
Маълумот ўрнида, Сандро 6 ёш бўлганида унинг отаси Валентино Маццола 1949 йилда «Торино» жамоаси билан бирга авиаҳалокатда ҳалок бўлган.
Маццола 1961 йилда 18 ёшида «Интер» асосий жамоасида дебют қилди ва 1977 йилда фаолиятини якунлагунга қадар фақат шу клуб шарафини ҳимоя қилди.
У «Интер» билан 4 марта Италия чемпиони бўлди, икки марта Европа Чемпионлар Кубоги ва икки марта Қитъалараро кубокни қўлга киритди. Маццола клуб сафида жами 565 та ўйинда 158 та гол урган.
У Италия миллий жамоаси таркибида 70 та учрашув ўтказиб, 22 та гол урди. Маццола 1968 йилда Европа чемпиони бўлган, 1970 йилги жаҳон чемпионатида эса кумуш медални қўлга киритган.
Футболчилик фаолиятини якунлагач, Маццола RAI телеканалида таҳлилчи ва шарҳловчи бўлиб ишлади. Шунингдек, «Интер» ва «Торино» клубларида раҳбарлик лавозимларида фаолият олиб борди.
