«Интер»нинг собиқ президенти Массимо Моратти 2012 йилда «Барселона» ҳужумчиси Лионел Мессини сотиб олишга урингани ҳақида гапирди.
«2012 йилда мен ақлбовар қилмас ишга қўл урдим: Месси учун 500 миллион евро таклиф қилдим. Ўша пайтда бу мисли кўрилмаган нарх эди. Музокаралар олиб бориш учун вице-президентимни Барселонага юбордим. Аммо Месси хатни ҳатто очмади ва таклиф ҳақида умуман билмади. У тафсилотларга киришмасданоқ таклифни рад этди, чунки ўзини бутун фаолияти давомида бошқа жамоага сотилмайдиган футболчи деб ҳисобларди.
Месси билан шахсан боғланишга муваффақ бўлдим ва у: «Менга бўлган қизиқишингизни қадрлайман, аммо фаолиятимни «Барселона»да якунлашни хоҳлайман», деди. Унинг оддий сўзлари шу эди. У «Барселона»да қолишни истарди. Мен вазиятни тушунардим, аммо уни пул билан қизиқтиришга уриндим — бу эса иш бермади», — дея Мораттининг сўзларини келтиради Sport.es.
