Пролига вакили – «Ғазалкент» Суперлига иштирокчиси - «Қўқон-1912»ни 2:1 ҳисобида таслим этди ва мусобақадан чиқариб юбориб, ўзи чорак финалга чиқди.
«Ғазалкент» бош мураббийи Зайниддин Тожиев матбуот анжуманида ғалаба борасида фикрларини айтиб ўтди.
- «Зомин»да ишлаганимда ҳам Қўқон жамоаси билан Кубокда тўқнаш келгандик. Қўқонда 1:1 ўйгандик. Бўлажак учрашув олдидан рақибни ўргандик, таҳлил қилдик. Футболчиларга берган барча кўрсатмаларни бажаришди. Бугун якка курашларда 80 фоизини ютишди, йигитларимиз. Бугунги ўйин учун шогирдларимга раҳмат. Улар тарих яратишди. Ҳали бунақа даражага чиқишмаган. Бир йиллик жамоа, энди. Раҳбарият Кубокда олдимизга қанча юқори кўтарилсак шунча яхши дейишган. Шу нарса футболчиларимизни қўлларидан келди.
- Ўйин олдидан таркибда учта жиддий йўқотиш бор эди. Шунга қарамасдан жамоангиз матонат кўрсатди. Бирданига уч нафар футболчингиз йўқлиги ўйин олдидан сизда қанчалик хавотир уйғотди?
- Машғулотда ҳам тайёрлаётганимизда барибир жамоамиз ёш. Олдимизда ҳеч қанақа мақсад қўйилмаган. Ўйинчиларни ривожлантириш, эртага кимдир четга кетса ўрнини босадиган ёшларимиз бор. Мана, бугун Суперлига жамоаси билан ўйнадик, умуман кам жойимиз йўқ. Таркибда ким йўқ бўлган бўлса, ўрнига тушган йигитлар ўйинни кучайтириб беришди. Бу ўйин йўқотишлар ўрнини босадиган футболчилар борлигини кўрсатиб берди. Қанча кўп болани хорижга берсак, бу фақат терма жамоамизга ёрдам.
- Қўқонликларни голларида кўпроқ Нимели иштирок этмоқда ва у бугун ҳам гол урди. Лекин биринчи бўлимда рақибни энг хавфли ҳужумчисини тўлиқ зарарсизлантира олдинглар. Учрашувдан олдин Нимелини қанчалик ўргангандинглар?
- Кучли томонини билардик. Тепага чиққанда беш киши ҳужумда ҳам юради. Кейин ҳимояда 3 киши билан ҳам ўйнашарди. Бугун 4-4-2 га ўтиб олишди. Уларни ўргандик. Нимелини ўнг оёғи кучли эди. Шу боис йигитларга уни ўнг оёғини ёпасизлар, бемалол чап томонига қўйиб юбораверинглар деб машғулотларда ҳам уқтиргандик. Кўрсатмаларни қўллашди, ҳаммаси биз хоҳлагандек бўлди.
- Лазиз Мирзаев жамоа «мотори». Лекин айрим эпизодларда тўпни қизғонгандек бўлди. Бу футболчи учун хос ҳолатми ёки натижага таъсир қилувчими?
- Йўқ, кўрпани тортиш ҳаммага ҳам эмас. Хурсандманки, Лазиз биринчи даврада «Локомотив»да ўйнади, иккинчи даврада бизга қўшилди. «Ғазалкент» жамоамизда Лазиз кўзга жуда яхши кўриняпти. Кўрпани ўзига тортяпти. Шундай бўлгач, йигитларни ортидан эргаштириш ҳам катта санъат. Ўзи ва болалар учун ҳам меҳнат қиляпти. Гол урди ё урмади – бу иккинчи даража. Вазиятларни яратяптими, ўша ҳудудда бўляптими, бу яхши. У керак бўлса 10 та ҳам, 15 та гол ҳам ура олади. Лазиз келганига жуда хурсандман. Бу келгуси фаолиятига катта туртки бўлади. Очилмаган қирраларини очяпти. Структурани бузмаяпти. Ҳимояда ҳам керак бўлса ёрдам беряпти», - дея Тожиевнинг сўзларини келтиради Tribuna.uz журналисти.
