Мадриднинг «Атлетико» клубининг собиқ ҳужумчиси Антуан Гризманн «Орландо Сити»даги расмий тақдимот маросимида МЛСга кўчиб ўтиши ҳақидаги фикрлари билан ўртоқлашди.
«18 ёшимдан бери МЛСда ўйнашни орзу қилардим. Мен бу ерга совринлар ютиш, мухлислар билан яқин муносабат ўрнатиш ва жамоадошларимнинг янада ривожланишига ёрдам бериш учун келдим.
«Интер Майами»га қарши Флорида дербиси ҳақида жуда кўп эшитганман. Лионел Месси билан яна майдонда тўқнаш келиш ёқимли бўлади. Шунингдек, Родриго Де Паул билан ҳам учрашишни интиқлик билан кутяпман. У билан жуда яхши муносабатдамиз», — дея Гризманнинг сўзларини L'Équipe нашри келтирди.
Эслатиб ўтамиз, 2026 йилнинг март ойида МЛС вакили «Орландо Сити» Антуан Гризманннинг Мадриднинг «Атлетико» клубидан трансфер қилинганини расман эълон қилганди.
