«Нюкасл» яримҳимоячиси Бруно Гимараэс қишда клубини ўзгартириш ниятида. Бу ҳақда журналист Мигел Делани хабар берди.
Футболчининг вакилларига яқин манбалар «Манчестер Юнайтед» билан алоқага чиққан. Қайд этилишича, бразилиялик футболчи «Нюкасл»даги ҳозирги ҳолатдан норози.
У ёзда клуб катта мақсадлар йўлида курашиш учун бирорта ҳам сифатли футболчи харид қилмаганидан кўнгли тўлмаяпти. Шунингдек, Гимараэс оиласига Нюкасл-апон-Тайн шаҳрида яшаш ёқмаяпти.
Яримҳимоячининг ўзи ҳам кетиш истагини жамоа бош мураббийи Эдди Ҳауга аллақачон маълум қилган. Қайд этиш лозим, Бруно «қарғалар» сафида 2022 йилдан буён тўп тепади.
Бу мавсумда у барча мусобақаларда 23 та ўйинда майдонга тушиб, 5 та гол урди ва 5 та ассист амалга оширди. Футболчининг клуб билан шартномаси 2028 йилга қадар амал қилади.
