France Football нашрининг собиқ бош муҳаррири Паскал Ферре Криштиану Роналду билан 2021 йилда юзага келган келишмовчилик ҳақида гапириб ўтди.
Ўшанда Ферре португалиялик футболчининг асосий орзуси Лионел Мессидан кўпроқ «Олтин тўп» ютиш эканини айтганди. Роналду эса бу гапларни ёлғон деб атаб, мақсади Месси билан рақобатлашиш эмас, балки совринлар қўлга киритиш эканини таъкидлаган.
«Ўша пайтда турли ОАВга «Олтин тўп» ҳақида интервюлар берардик. The New York Times билан суҳбатда Криштианунинг орзуси Мессидан кўпроқ «Олтин тўп» ютиш эканини айтгандим.
Ўйлашимча, унчалик тўғри иш қилмаганман. Балки сукут сақлашим керак эди. Бироқ унинг жуда катта мақсадларга интиладиган ва рақобатбардош инсон экани сир эмас эди.
У менга шахсан ҳеч нарса демади, аммо кейин ижтимоий тармоқларда жавоб қайтарди. Очиғи, унинг миллионлаб обуначилари олдида ёлғончи бўлиб кўриндим. Лекин умуман олганда, бунда қўрқинчли ҳеч нарса йўқ», — деди Ферре Marca нашрига берган интервюсида.
Эслатиб ўтамиз, Роналду 30 сентябр куни Португалия миллий жамоаси қароргоҳини тарк этганди. Футболчи ва бош мураббий Жезуш ўртасидаги келишмовчилик Норвегияга қарши Миллатлар Лигаси доирасидаги учрашув (2:1)дан кейин юзага келган. Ўша баҳсда Роналду 18 йил ичида илк бор миллий жамоанинг расмий ўйинини тўлиқ захира ўриндиғида ўтказган.
Мухлислар бу янгиликни Telegram’да муҳокама қилмоқда
Изоҳлар Telegram’да очилади