«Байер» ҳужумчиси Кристиан Кофане фаолиятини Англияда давом эттириши мумкин. Бу ҳақда Sport Witness хабар берди.
Манбага кўра, «Арсенал» жамоаси камерунлик 20 ёшли футболчини ўз сафига қўшиб олишдан манфаатдор. Лондон клуби трансферни январ ойидаёқ амалга оширишни режалаштирмоқда.
Қайд этилишича, клуб Кофаненинг агентлари билан музокара ўтказиб, эҳтимолий трансфер имкониятларини ўрганган. Бироқ расмий таклиф ҳозирча тайёрланганича йўқ.
Маълумот учун, Кристиан бу мавсумда «Байер» сафида барча турнирлар доирасида 6 та учрашувда майдонга тушиб, 3 та гол урди. Унинг клуб билан шартномаси 2029 йилнинг ёзига қадар мўлжалланган.
Аввалроқ «Арсенал» клуби бош мураббий Микел Артета билан янги шартнома имзоланганини расман эълон қилганди.
