«Манчестер Сити»нинг собиқ яримҳимоячиси Фернандинё клубнинг Премер-лига молиявий қоидаларини бузганликда айбдор деб топилгани ҳақида фикр билдирди. Бразилиялик футболчи «шаҳарликлар» сафида 2013–2022 йилларда тўп тепган.
«Мен бу кун келишини билардим. Улар буни яшириш учун жуда кўп ҳаракат қилишди, аммо қуёш остида ҳеч нарсани абадий яшириб бўлмайди. Айримларимиз содир бўлаётган ноқонуний ишларни билардик. Аммо клуб раҳбарияти Премер-лига бундан хабардор эканини айтиб, бизни ҳаммаси қонуний эканига ишонтирди. Шу сабабли биз шунчаки ўз ишимизни қилиб, кетардик», — дея Фернандинио сўзларини FullTimeReport Х ижтимоий тармоғида келтирди.
Собиқ футболчи «Манчестер Сити»нинг айбдор деб топилгани уни хафа қилганини ҳам таъкидлади.
«Энди уларнинг 115 та айблов бўйича айбдор деб топилганини эшитиш жуда ачинарли», — дея қўшимча қилди бразилиялик.
Маълумот учун, Фернандинио «Манчестер Сити» сафида 9 йил давомида тўп тепиб, клуб билан бир қатор совринларни қўлга киритган.
Эслатиб ўтамиз, «Манчестер Сити» Премер-лиганинг молиявий қоидаларини бузганликда айбланган ва иш бўйича мустақил комиссия томонидан кўриб чиқилган.
