«Эвертон» вингер Илиман Ндиайенинг трансфер нархини белгилаб олди.
Журналист Патрик Бойленд хабарига кўра, мерсисайдликлар 26 ёшли футболчини камида 81 миллион еврога баҳоламоқда.
Манбада айтилишича, Ндиайенинг ўзи трансфер сўрови билан чиқмаган. Бироқ клуб ҳозирча футболчи билан янги шартнома борасида келишувга эриша олмаган.
Сенегаллик футболчи 2024 йилда «Марсел»дан 18 миллион евро эвазига «Эвертон» сафига қўшилганди.
Шундан буён у клуб сафида 71 та баҳсда майдонга тушиб, 17 та гол урди ва 3 та голли узатмага муаллифлик қилди.
Эслатиб ўтамиз, Ндиайе сўнгги мавсумларда «Эвертон»нинг ҳужумдаги асосий футболчиларидан бири бўлиб келмоқда.
Маълумот учун, Тransfermarkt портали футболчининг бозор қийматини 55 миллион еврога баҳолаган.
