«Эҳтиёт бўлинг. Сиз бошқа ўйинни кўрибсиз» — Постекоглу Роналдуни танқид қилган журналистга

«Ан Наср» бош мураббийи Анже Постекоглу Осиё Чемпионлар лигаси гуруҳ босқичи доирасида «Ал Айн»дан 0:4 ҳисобида мағлуб бўлганидан сўнг журналист билан ҳиссиётга берилган ҳолда мулоқот қилди.

Матбуот анжуманида журналист Криштиану Роналду ва жамоанинг баҳсга тайёргарлиги ҳақида савол берди.

«Сиз ёмон тайёрланганимизни айтяпсиз, аммо бу ҳақиқат эмас. Ростгўй бўлинг. Бу — менинг масъулиятим. Балки ўз ишимни керакли даражада бажара олмагандирман. Майли, шундай бўлсин. Аммо, илтимос, тайёргарлик ҳақида бундай гапирманг», — деб жавоб берди мутахассис.

Шундан сўнг журналист Роналдунинг «Ан Наср»га ёрдам бермаётганини айтди.

«Криштиану аллақачон 3 та гол урди. Унинг тайёргарлик жараёнидаги иштироки чекланганди. Гап футболчиларда эмас. Улар бор кучларини ишга солишяпти. Улар кучли характерга эга, юқори даражали футболчилар. Масъулият менинг зиммамда, тушунарлими?

Ҳамма учун намуна бўлиб турган инсон ҳақида бундай гапириш керак эмас. Шунингдек, фаолиятини давом эттириш учун ҳар қандай қурбонликка бориб, катта карьера қурган инсонлар ҳақида бундай фикрларни билдиришда эҳтиёткор бўлиш керак.

Айтганимдек, мени танқид қилишингиз мумкин — ҳеч қандай муаммо йўқ. Бу — оддий ҳолат. Ахир у учта ўйинда гол урмадими? Бу баҳсда ҳам унда гол уриш учун имкониятлар бўлмадими?»

Журналист Роналду бу ўйинда «ҳеч нарса» қилмаганини яна айтганида, Постекоглу шундай жавоб берди: «Сиз бошқа ўйинни кўрибсиз».