«Тоттенҳэм» бош мураббийи Роберто Де Зерби бразилиялик ҳужумчи Ришарлисон жамоа билан машғулот ўтказмаётганини маълум қилди.
«Бу унинг ўзи қабул қилган қарор. Мен ҳам, клуб ҳам эмас. Бу ҳақда мендан сўраманг, чунки қарорни мен қабул қилмаганман ва ушбу вазият учун жавобгар эмасман», — деди Де Зерби журналистларга.
Аввалроқ Ришарлисон «Тоттенҳэм»ни тарк этмоқчи экани, бироқ унинг «Эвертон»га ўтиши амалга ошмагани ҳақида хабар берилганди. Ҳозир ҳужумчига «Трабзонспор» қизиқиш билдирмоқда. Шунингдек, «Тоттенҳэм» бразилиялик футболчи билан шартномани бекор қилиши мумкинлиги ҳам айтилган.
Ришарлисоннинг «Тоттенҳэм» билан амалдаги шартномаси 2027 йил июнигача мўлжалланган.
