Амалдаги жаҳон чемпиони Гукеш Доммаражу Варшавадаги турнир олдидан берган интервюсида ўзбекистонлик Жавоҳир Синдаров ҳақида ўз фикрлари билан ўртоқлашди.
«Жавоҳир Синдаров Номзодлар турнирида эришган натижа шунчаки ҳайратланарли ва жуда доминантлик. У ўтган йили Жаҳон кубогини ютиб, ўзининг қанчалик кучли эканлигини кўрсатганди. Уни элитага олиб кирган янги энергияси шахмат олами учун жуда фойдали.
Жаҳон тожи учун баҳс? Биз деярли тенгдошмиз. Номзодлар турнири ва жаҳон чемпионлиги учун матч — бу бутунлай бошқа-бошқа мусобақалар. Шунинг учун ҳозирги натижалардан узоқ муддатли хулоса чиқармаган бўлардим. Олдинда бизни жуда ҳаяжонли беллашув кутмоқда.
Фаворит? Одатдагидек мен фаворитларга ишонмайман. Белгиланган кунда ўзининг энг яхши ўйинини кўрсатган шахматчи ғалаба қозонади. Мақсадим — бор маҳоратимни кўрсатиш», — дея ҳиндистонлик чемпионнинг сўзларини келтиради UzChess.
Аввалроқ жаҳон чемпионлиги учун баҳс санаси эълон қилинганди.
