Аргентина футбол ассоциацияси Лионел Месси шарафига махсус акция ўтказилишини эълон қилди.
Миллий жамоа сардори 31 август куни халқаро фаолиятини якунлашини маълум қилганди. Шу муносабат билан Аргентинадаги эркаклар ва аёллар чемпионатларида кейинги тур учрашувлари 10-дақиқада тўхтатилади.
Шу пайтда ўйин иштирокчилари афсонавий футболчига қарсаклар билан ҳурмат кўрсатади. Мухлислар ҳам ушбу ташаббусни қўллаб-қувватлаши кутилмоқда.
Шунингдек, ушбу бир дақиқа давомида стадионлардаги экранларда ассоциация томонидан тайёрланган махсус видеоролик намойиш этилади.
