Аргентина ва Испания миллий жамоалари ўртасидаги Финалиссима ўйини бекор қилиниши мумкин. Бу ҳақда El Chiringuito нашри хабар берди.
Бунгача Аргентина — Испания беллашувини Мадриддаги «Бернабеу» стадионида ўтказиш мумкинлиги ҳақида хабарлар тарқалганди. Дастлаб ўйин 27 март куни Доҳа шаҳрида ўтказилиши режалаштирилган, аммо Яқин Шарқдаги вазият туфайли уни бошқа жойга кўчиришга қарор қилинган. Кейинроқ Аргентина миллий жамоаси Мадридда ўйнашдан бош тортгани маълум бўлди.
TyC Sports журналисти Гастон Эдулнинг маълум қилишича, Аргентина футбол ассоциациясининг (AFA) Финалиссима бўйича сўнгги таклифи шундай: ўйин 31 март куни ва нейтрал майдонда ўтказилиши керак, акс ҳолда баҳс умуман бўлмайди.
ESPN журналисти Эстебан Эдул эса Аргентина томони ўйинни 31 март куни Римдаги «Олимпия» стадионида ўтказишни таклиф қилганини ёзди. Ҳозирча бошқа вариантлар қолмаган.
El Chiringuito нашри эса яқин соатлар ичида Финалиссима бекор қилингани ҳақида расмий баёнот берилиши мумкинлигини хабар қилди. Аввалроқ Финалиссима икки ўйинлик форматда ўтиши мумкинлиги маълум қилинганди.
