Аргентина футболчиларининг дисквалификациялари ўртоқлик ўйинларига ҳам ўтади

Аргентина миллий жамоаси футболчиларининг ЖЧ-2026 финалидаги хатти-ҳаракатлари учун берилган дисквалификация муддатига ўртоқлик ўйинлари ҳам ҳисобга олинади.

Эслатиб ўтамиз, Аргентина ва Испания (0:1) ўртасидаги финал баҳсидан сўнг майдонда жамоалар футболчилари ўртасида оммавий жанжал келиб чиққанди. Аргентина миллий жамоаси ва «Рома» ҳимоячиси Науэл Молина унинг ёнидан ўтиб кетаётган Испания сардори Родрининг кўкрагига қўли билан урган. «Манчестер Сити» яримҳимоячиси тўхтаб, Молина олдига борган ва улар ўртасида тортишув бошланган. Кейинчалик жанжалга бошқа футболчилар, жумладан, Леандро Паредес ҳам қўшилган.

Паредес дастлаб Испания миллий жамоаси ҳимоячиси Эрик Гарсияни қўпол тарзда итарган, сўнг унинг томоғидан ушлаган. Жамоадоши учун Гави ҳимояга келган, бироқ «Бока Хуниорс» яримҳимоячиси испаниялик футболчини ерга йиқитган.

Бундан ташқари, Аргентина мураббийлар штаби аъзоси Роберто Айяла финал ҳуштаги чалинганидан сўнг испаниялик яримҳимоячи Дани Олмо билан тортишган ва кейин унинг юзига урган. Шундан сўнг Эрик Гарсия қўли билан аргентиналик мутахассисни кўкрагидан енгилгина итарган.

ФИФА Паредесни 10 та, Молинани 7 та, Тиаго Алмадани эса 1 та ўйинга дисквалификация қилди. Айяла 3 та баҳсга четлатилди.

Аргентина футбол ассоциацияси (AFA) баёнотида шундай дейилади:

«Аргентина футбол ассоциацияси FIFA'га расмий равишда мурожаат қилиб, 2026 йилги Жаҳон чемпионати финали вақтида футболчиларига, шунингдек, ассоциациянинг ўзига нисбатан қўлланилган санкцияларни А даражасидаги ўртоқлик учрашувлари ва расмий ўйинларда (қайси бири аввал бўлиб ўтса, ўша баҳсдан бошлаб) ўташга рухсат беришни сўради. FIFA Интизом қўмитаси амалдаги низомларга мувофиқ ушбу сўровни қаноатлантиришга қарор қилди.

Шунга қарамай, AFA ўз ҳуқуқлари ва футболчиларининг ҳуқуқларини ҳимоя қилган ҳолда, FIFA Апелляция қўмитасига тегишли шикоятларни тақдим этиш учун қабул қилинган қарорларнинг ёзма асосланишини кутиб қолмоқда. Эҳтимол, якуний инстанция Спорт арбитраж суди (CAS) бўлиши мумкин».