«Росарио Сентрал» футболчиси Анхел ди Мария яқин орада профессионал фаолиятини якунлаши мумкинлигини айтди. 37 ёшли аргентиналик вингер бу ҳақда жамоаси Либертадорес кубогидан чиқиб кетганидан сўнг маълум қилди.
«Росарио Сентрал» турнир 1/8 финалининг жавоб учрашувида «Коринтианс»га мағлуб бўлди. Биринчи ўйиндаги дурангдан сўнг аргентиналикларнинг кейинги босқичга чиқиш имконияти яхши эди. Айниқса, рақиб футболчиси четлатилганидан кейин имконият янада ошганди. Лекин «Росарио Сентрал» 80-дақиқада гол ўтказиб юборди ва мусобақадаги иштирокини якунлади.
Учрашувдан сўнг Ди Мария энди фаолиятини давом эттириш борасидаги режаларини қайта кўриб чиқиши мумкинлигини тан олди.
«Ҳозир қийин давр, чунки менинг орзум фаолиятимни давом эттириш эди. Бироқ бу футбол. Энди мен ўйлаб, кейин нима қилишни хоҳлаётганимни ҳал қилишим керак.
Бизда кўплаб имкониятлар бўлди, аммо бу биз ўтказишни хоҳлаган ўйин эмасди. Кўп қийинчиликларга дуч келдик ва ўз имкониятларимизни голга айлантира олмадик.
Баъзида ҳамма нарса хоҳлаганингиздек бўлмайди. Ҳозир биз билан ҳам худди шундай бўлди», — деди Анхел.
Маълумот ўрнида, 2024 йилда аргентиналик футболчи миллий жамоасидаги фаолиятини якунлаган. Аввалроқ «Росарио Сентрал» Аргентина чемпиони бўлгани маълум қилинганди.
