«Арсенал» марказий ҳужумчиси Виктор Гокереш жамоанинг асосий таркибидаги ўрнини йўқотганидан сўнг фаолиятини бошқа клубда давом эттириши мумкин. Швециялик футболчига бир нечта жамоа қизиқиш билдираётгани ҳақида инсайдер Экрем Конурнинг саҳифасида маълум қилинди.
Манбага кўра, Гокерешга Италиянинг «Ювентус» ва «Милан» клублари, шунингдек, Саудия Арабистонининг «Ал Аҳли» ҳамда «Ал Иттиҳод» жамоалари қизиқиш билдирмоқда.
Швециялик ҳужумчи «Арсенал»даги ҳозирги ҳолатидан норози. Бунга бош мураббий Микел Артетанинг асосий таркибда немис футболчиси Кай Ҳаверцга кўпроқ ишонч билдираётгани сабаб бўлаётгани айтилмоқда.
Гокереш ўтган ёзда «Арсенал» сафига келиб қўшилган ва Лондон клуби билан беш йиллик шартнома имзолаган. Унинг амалдаги шартномаси 2030 йилгача мўлжалланган.
Маълумот учун, 27 ёшли ҳужумчининг трансфер қиймати 65 миллион еврога баҳоланмоқда. Гокереш «Арсенал»нинг ҳужум чизиғида марказий ҳужумчи сифатида ўйнамоқда.
