«Реал» яримҳимоячиси Жуд Беллингҳэм Мадрид клуби билан янги узоқ муддатли шартнома имзолашга яқин. Келишув 2032 йилгача мўлжалланиши мумкин. Бу ҳақда инсайдер Николо Скира ижтимоий тармоқларда маълум қилди.
Манбага кўра, томонлар янги шартнома шартларини деярли тўлиқ келишиб олган ва музокаралар якуний босқичга етган. Беллингҳэм «Реал» сафида 2023 йил ёзидан буён ўйнамоқда.
23 ёшли яримҳимоячининг клуб билан амалдаги шартномаси 2029 йил июн ойи охиригача мўлжалланган. Янги келишув имзоланса, инглиз футболчиси Мадрид клубида яна бир неча йил қолади.
Беллингҳэм ушбу мавсум барча турнирларда «Реал» сафида еттита баҳсда майдонга тушиб, учта гол урди ва учта голли узатмани амалга оширди.
Маълумот учун, Transfermarkt инглиз яримҳимоячисининг трансфер қийматини 160 миллион еврога баҳоламоқда. Беллингҳэм 2023 йилда Дортмунднинг «Боруссия» клубидан «Реал»га ўтган.
