«Barselona» hujumchisi Lamin Yamal mashhur qo‘shiqchi Shakira va sobiq futbolchi Jerar Pike yashagan 14 million yevrolik uyni sotib olayotgani haqida ijtimoiy tarmoqlarda xabar tarqaldi.
Yamal Instagram’dagi 14 million kuzatuvchisiga ta’sirli suratlar to‘plamini joylab, orqa tomoni bilan kameraga qarab, hashamatli villa va uning hovuziga qarab turganini ko‘rsatgan. Shu surat orqali u mazkur mulkni xarid qilmoqchi ekanini go‘yo tasdiqlagandek bo‘ldi.
2012-yilda qurilgan ushbu qarorgoh dastlab 3 800 kvadrat metr maydonda joylashgan uchta binodan iborat bo‘lgan. Unda usti yopiq va ochiq suzish hovuzlari, tennis korti hamda Shakiraning o‘zi foydalanadigan ovoz yozish studiyasi mavjud. Juftlik 2022-yilda ajrashganidan so‘ng, uy 14 million yevroga savdoga qo‘yilgan, biroq ikki yil davomida xaridor topilmagan. Keyinchalik kichik binolardan biri alohida sotilgan va umumiy narx 11 million yevroga tushirilgan.
Ispaniyaning Mundo Deportivo nashriga ko‘ra, Yamal endi ushbu hashamatli uyni sotib olib, amakivachchasi va yaqin do‘sti bilan shu yerga ko‘chib o‘tishni rejalashtirmoqda. U shuningdek, binoni o‘z didiga moslab rekonstruksiya qilish uchun katta mablag‘ sarflashni ham mo‘ljallagan.
Manbalarga ko‘ra, asosiy binoda 6 ta yotoq xonasi va 5 ta hammom mavjud. Uy O‘rta Yer dengiziga qaragan shisha devorli keng mehmonxonaga ega. Tashqi hududda esa maysazor va dam olish zonasi joylashgan. Shakiraning sobiq studiyasi esa endi o‘yin xonasi yoki shaxsiy kinoteatrga aylantirilishi mumkin.
Bu xarid Yamal uchun yangi davrni boshlab beradi. U may oyida «Barselona» bilan 6 yillik shartnoma imzolagan bo‘lib, yiliga taxminan 30 million yevro ishlab topadi. Bu uni dunyoning eng ko‘p maosh oladigan yosh futbolchilaridan biriga aylantirgan. Forbes ma’lumotlariga ko‘ra, reklama shartnomalari bilan birgalikda uning yillik daromadi 43 million dollarga yetadi.
Shu bilan birga, Yamal so‘nggi haftalarda chanoq mushaklari bilan bog‘liq jarohat sabab muammolarga duch kelmoqda. Bu xastalik Lionel Messida ham kuzatilgan bo‘lib, davolanishi murakkab sanaladi.
