Termizning «Surxon» jamoasi Superliganing 25-turida «Buxoro» mehmoni bo‘lib, 0:0 hisobida durang qayd etdi.
Natijada Anvar G‘ofurov boshqaruvidagi «tulporlar» ketma-ket uchta bellashuvda golsiz durang qayd etishga muvaffaq bo‘ldi. Jamoa bunga qadar «Qizilqum» va «Xorazm»ga qarshi bahslarda ham xuddi shunday natijaga erishgan.
«Surxon» so‘nggi bor 20-sentabr kuni «Qo‘qon-1912»ga qarshi o‘yinda raqibini minimal hisobda yenggan.
Jamoaning duranglari soni 8 taga yetdi. Shu kungacha raqiblar darvozasini 19 marta ishg‘ol qilgan. 7 ta o‘yinda g‘alaba qozonib, 10 bor mag‘lubiyat alamini totib ko‘rgan.
G‘ofurov boshqaruvidagi termizliklar hozirda 29 ochko bilan 12-o‘rinda bormoqda. Keyingi turda jamoa «Nasaf»ga qarshi o‘ynaydi. Ushbu bahs 31-oktabr kuniga belgilangan.
